မြန်မာနိုင်ငံမှာ ပြီးခဲ့တဲ့တပတ်အတွင်း ကိုဗစ်-၁၉ ဓာတ်ခွဲအတည်ပြုလူနာသစ် ၅၂ ယောက် တွေ့ရလို့ ရှေ့တပတ်ကထက်များလာသလို တွေ့တဲ့ရာခိုင်နှုန်းကလည်း ၂ ဆလောက်များလာပြီး အသက် ၅ နှစ်အရွယ် ကလေးတွေကစလို့ ကိုဗစ်ကာကွယ်ဆေးထိုးမယ့်အစီအစဉ်ကိုလည်း စစ်ကောင်စီ ကျန်းမာရေးဌာနက ထုတ်ပြန်ထားပါတယ်။

ဇွန် ၈ ရက် ည ၈ နာရီကနေ ဇွန် ၁၅ ရက် ည ၈ နာရီအထိ တပတ်အတွင်း လူပေါင်း ၂,၂၈၅ ယောက်ကို စစ်ဆေးပြီးစီးခဲ့တာမှာ ကိုဗစ်-၁၉ ရောဂါဓာတ်ခွဲအတည်ပြုလူနာသစ် ၅၂ ယောက် တွေ့ရတယ်လို့ ဇွန် ၁၆ ရက် ညမှာ ထုတ်ပြန်ပါတယ်။

ဇွန် ၈ ရက်အထိ ရက်သတ္တပတ်အတွင်း ပိုးတွေ့သူ ၃၁ ယောက်၊ ပိုးတွေ့နှုန်း ၁ ဒသမ ၄၄ ရာခိုင်နှုန်းရှိပြီး အခုအပတ်မှာတော့ ပိုးတွေ့နှုန်းက ၂ ဒသမ ၂၈ ရာခိုင်နှုန်း အထိ မြင့်တက်လာပါတယ်။

လူနာတွေ့ရတာကတော့ မွန်ပြည်နယ်၊ ဘီးလင်းမှာ ၂၃ ယောက်၊ ကျိုက်ထိုမှာ ၁ ယောက်၊ ရန်ကုန် မြောက်ဥက္ကလာမှာ ၄ ယောက်၊ ဗဟန်းမှာ ၃ ယောက်၊ မင်္ဂလာဒုံ၊ အင်းစိန်၊ သင်္ဃန်းကျွန်း၊ မရမ်းကုန်း၊ ရွှေပြည်သာ၊ သာကေတ၊ ရန်ကင်း၊ အလုံ၊ ဒဂုံမြို့သစ် တောင်ပိုင်းနဲ့ မြောက်ပိုင်းမှာ ၁ ယောက်စီ၊ မကွေးတိုင်း ဂန့်ဂေါမှ ၇ ယောက်၊ မန္တလေးတိုင်း ပြည်ကြီးတံခွန်နဲ့ တံတားဦးမှာ ၁ ယောက်စီ၊ နေပြည်တော် ဇမ္ဗူသီရိမှာ ၁ ယောက်၊ ရှမ်းပြည်နယ် ကျိုင်းတုံမှာ ၁ ယောက်ဖြစ်တယ်လို့ ရောဂါကာကွယ်ထိန်းချုပ်ရေး ဗဟိုဌာနက ဒီမနက်မှာ ထုတ်ပြန်လာပါတယ်။

ဒီလူနာတွေထဲမှာ ပြင်းထန်လူနာ၊ အထူးကြပ်မတ်ကုသပေးရတဲ့လူနာနဲ့ ကိုဗစ်-၁၉ ရောဂါနဲ့ သေဆုံးလူနာမရှိဘူးလို့ ဆိုပါတယ်။

မြန်မာနိုင်ငံမှာ ကိုဗစ်ရောဂါ စဖြစ်ချိန်ကနေ ၂၀၂၅ ခုနှစ်၊ ဇွန် ၈ ရက်အထိ  ပိုးတွေ့သူစုစုပေါင်း ၆၄၃,၃၃၉ ယောက်၊  သေဆုံးသူစုစုပေါင်း ၁၉,၄၉၄ ယောက် ရှိခဲ့တယ်လို့လည်း ကျန်းမာရေးဌာနရဲ့ အချက်အလက်တွေအရ သိရပါတယ်။

ကမ္ဘာ့နိုင်ငံတချို့မှာ ကိုဗစ်မျိုးကွဲသစ်တွေတွေ့နေရသလို ကမ္ဘာ့ကျန်းမာရေးအဖွဲ့ကတော့ ကိုဗစ်-၁၉ ရောဂါဖြစ်ပွားတာဟာ ကမ္ဘာတဝန်းလုံးမှာ၊ အထူးသဖြင့် အရှေ့ပိုင်းမြေထဲပင်လယ်ဒေသမှာ တိုးလာနေပေမယ့် ဒါဟာ ပြီးခဲ့တဲ့နှစ်ကလိုပဲမို့ သိပ်ပြီးတော့ မထူးခြားဘူးလို့ ထုတ်ပြန်ပါတယ်။ 

ကိုဗစ်ရောဂါတကျော့ပြန်ခေါင်းထောင်လာပြီးနောက်ပိုင်း COVID-19 Vaccine COMIRNATY (Omicron JN.1) ဒါမှမဟုတ် COVID-19 Vaccine COMIRNATY (Omicron XBB.1.5) သုံးပြီး ဆေးတကြိမ်မှ မထိုးနှံရသေးသူတဲ့ အသက် ၁၈ အထက်ရှိသူတွေကို မေလနဲ့ ဇွန်လဆန်းမှာ တကြိမ်ထိုးနှံပေးမယ်လို့ ကျန်းမာရေးဌာနက အခုဇွန်လထဲမှာ ထုတ်ပြန်ထားပါတယ်။

ကမ္ဘာ့ကျန်းမာရေးအဖွဲ့ရဲ့ အကြံပြုချက်တွေထိုးနှံတာလို့ဆိုပြီး ထပ်ဆောင်းကာကွယ်ဆေး ၁ ကြိမ် အဖြစ် ကိုဗစ်-၁၉ ရောဂါကာကွယ်ဆေး နောက်ဆုံးအကြိမ် ထိုးနှံပြီးတာ ၆ လ ပြည့်ပြီးတဲ့ ကျန်းမာရေးဝန်ထမ်းတွေနဲ့ နိုင်ငံဝန်ထမ်းတွေအားလုံး၊ အသက် ၆၀ နှစ်အထက်ရှိသူတွေ၊ အသက် ၅၀ နှစ်အထက် နာတာရှည်ရောဂါရှိသူတွေကို ထိုးနှံပေးမယ်လို့ ဆိုပါတယ်။

ကိုဗစ်-၁၉ ရောဂါကာကွယ်ဆေး နောက်ဆုံးအကြိမ် ထိုးနှံပြီးစီးတာ ၁၂ လ ပြည့်ပြီးတဲ့ အသက် ၁၈ နှစ်အထက် နာတာရှည်ရောဂါရှိသူတွေ၊ အသက် ၁၂ နှစ်အထက် ကိုယ်ခံအားနည်းရောဂါရှိပြီး ကိုဗစ်-၁၉ ရောဂါ ကာကွယ်ဆေးထိုးဖို့လိုအပ်သူတွေ၊ ကိုယ်ဝန်ဆောင်ကာလ ၃ လနဲ့ အထက်ရှိတဲ့ ကိုယ်ဝန်ဆောင်မိခင်တွေကို ကိုဗစ်-၁၉ ရောဂါကာကွယ်ဆေး ၁ ကြိမ် ထိုးပေးမယ်လို့ ဆိုပါတယ်။

ဒါ့အပြင် COVID-19 Vaccine COMIRNATY (Omicron XBB.1.5) ကာကွယ်ဆေးသုံးပြီးတော့ အသက် ၅ နှစ်ကနေ ၁၁ နှစ် အတွင်းရှိ ကင်ဆာရောဂါနဲ့ ကိုယ်ခံအားနည်းရောဂါရှိတဲ့ ကလေးတွေကို တကြိမ် ထိုးနှံပေးမယ်လို့ ထုတ်ပြန်ထားပါတယ်။

အသက် ၅ နှစ်ကနေ ၁၁ နှစ်ရှိပြီး ကျန်းမာတဲ့ ကလေးငယ်တွေ၊ အသက် ၁၂ နှစ်ကနေ ၁၈ နှစ်အရွယ် ဆယ်ကျော်သက်တွေ၊ အသက် ၁၈ နှစ်အထက် ကျန်းမာသူတွေကို ကိုဗစ်-၁၉ ရောဂါ ထပ်ဆောင်းကာကွယ်ဆေးထိုးဖို့ ကမ္ဘာ့ကျန်းမာရေးအဖွဲ့က အကြံမပြုထားဘူးလို့လည်း ဆိုပါတယ်။